پاکستان میں متعین امریکی سفیر ڈونلڈ بلوم نے کہا ہے کہ یو ایس ایڈ بنیادی صحت، خواتین کی تعلیم اور معاشی بہتری میں بھی تعاون کرے گا۔ڈبلیو ایس ایس پی پشاور آفس کے دورے کے موقع پر ان کا کہنا تھا کہ امریکی سفیر نے 44 ملین ڈالر سے زائد کی لاگت سے مکمل ہونے والے پروجیکٹ کی تقریب میں شرکت کی۔تقریب سے خطاب کرتے ہوئے ڈونلڈ بلوم کا کہنا تھا کہ میونسپل سروسز پروگرام سے پشاور کے 20 لاکھ افراد کی زندگی بہتر ہوئی۔ پشاور میں اربن فلڈنگ کے خدشات کو کم کیا گیا۔ صوبے میں قدرتی اور دیگر آفات سے تباہ حال انفرااسٹرکچر کی بحالی میں تعاون کیا جائے گا۔ امریکی سفیر کو دی گئی بریفنگ میں بتایا گیا کہ میونسپل سروسز پروگرام کا یہ منصوبہ 12 سال میں مکمل کیا گیا۔ اس سے 4 لاکھ 48 ہزار افراد پینے کے پانی کی سہولتوں کی بحالی سے مستفید ہوئے، جبکہ سیوریج اور ڈرینج لائنز کی بحالی سے10 لاکھ سے زائد افراد مستفید ہوئے۔ بریفنگ میں مزید بتایا گیا کہ میونسپل ویسٹ منیجمنٹ کی بہتری کے لیے 575 گاڑیاں بھی فراہم کی گئیں اور ویسٹ منیجمنٹ آلات کی مرمت کےلیے ورکشاپ بھی بنائی گئی۔
