ترجمان پاکستان پیپلزپارٹی فیصل کریم کنڈی کا کہنا ہے کہ (ن )لیگ کی سیاست ڈرائنگ روم کی سیاست ہے۔اسلام آباد میں پریس کانفرنس کرتے ہوئے ان کا کہنا تھا خود کو ملک کی بڑی کہلوانے والی پارٹی الیکشن سے کیوں بھاگ رہی ہے؟ ہم نے ہمیشہ کہا کہ نیب سیاسی انتقام کیلئے استعمال ہورہی ہے، ایک زمانہ تھایہی نیب نوازشریف پر دھڑا دھڑ کیس بنارہی تھی، نیب ایک ادارہ ہے کسی شخصیت کا نام نہیں، پہلے نیب سے سزائیں مل رہی تھیں،اب دھڑا دھڑ معاف ہورہی ہیں، نیب ماضی میں غلط تھی یا آج غلط ہے عوام کو بتایا جائے، نیب کسی کی جاگیر نہیں بلکہ ایک ادارہ ہے۔
انہوں نے کہا کہ الیکشن 8 فروری کو ہی ہونے چاہئیں ، جنگوں میں بھی الیکشن ہوتے ہیں ، بینظیر بھٹو کی شہادت پر بھی الیکشن لڑا، نوجوان نسل سلیکشن اور لاڈلے پن کو قبول نہیں کرے گی، فیصلہ عوام کو کرنے دینا چاہیے۔8فروری کو عوام کا فیصلہ قبول کریں گے ، مسلم لیگ (ن )کے کچھ دوست کہہ رہے ہیں الیکشن 2ہفتے تاخیر سے ہوں گے، تمام سیاسی جماعتوں کے تحفظات دور ہونے چاہئیں۔
