احتساب عدالت نے سابق وزیر اعظم عمران خان اوران کی اہلیہ بشریٰ بی بی کیخلاف توشہ خانہ ریفرنس سماعت کیلئے مقرر کرلیا۔تفصیلات کے مطابق ایک روز قبل نیب کی جانب سے عمران خان اور بشریٰ بی بی کی خلاف دائر ہونے والے ریفرنس پر احتساب عدالت میں 23 دسمبر کو سماعت جج محمد بشیر کریں گے، احتساب عدالت نے سماعت کے حوالے سے ملزمان کو طلبی کے نوٹس جاری کردیئے۔خیال رہے کہ نیب کی جانب سے گزشتہ روز عمران خان اور ان کی اہلیہ کے خلاف توشہ خانہ ریفرنس دائر کیا گیا تھا، ریفرنس میں مؤقف اختیار کیا گیا تھا کہ وزارت عظمیٰ کے دوران عمران خان اور بشری بی بی کو مختلف سربراہان مملکت کی جانب سے 108 تحائف ملے ، 108 تحائف میں سے 58 تحائف ملزمان نے رکھ لیےجن کی مالیت 14 کروڑ روپے تھی۔ ریفرنس میں کہا گیا ہے کہ گزشتہ سال یکم اگست کو چیئرمین نیب نےتوشہ خانہ ریفرنس پر تحقیقات شروع کرنے کے احکامات دیئے اور پھر ڈی جی نیب نے گزشتہ سال 5 اگست کو شروع کیں۔ ریفرنس میں لکھا گیا ہے کہ رواں سال 14 جولائی کو توشہ خانہ کی تحقیقات تفتیش میں تبدیل ہوئیں، نیب کے مطابق عمران خان نے سعودی ولی عہد سے موصول ہونے والا جیولری سیٹ 90 لاکھ روپے کے عوض رکھا گیا،بشریٰ بی بی اور بانی پی ٹی آئی نے اتھارٹی کا استعمال کرتے ہوئے جیولری سیٹ کی من پسند قیمت لگوائی بعد ازاں جیولری سیٹ کی اصل قیمت لگانے کے لیے دبئی کے ماہر سے بھی رابطہ کیا گیا۔
