سپریم کورٹ نے پی ٹی آئی کے بلے کے انتخابی نشان سے متعلق کیس کا تفصیلی فیصلہ جاری کر دیا۔نجی ٹی وی کےمطابق 38 صفحات پر مشتمل فیصلہ چیف جسٹس سپریم کورٹ قاضی فائز عیسیٰ نے لکھا،سپریم کورٹ کے تفصیلی فیصلے میں کہا گیا ہے کہ تحریک انصاف نے انٹرا پارٹی الیکشن میں اپنے ہی ممبران کو لاعلم رکھا۔ قانون کے مطابق پی ٹی آئی کو بلے کا انتخابی نشان نہیں دیا جا سکتا۔ الیکشن ایکٹ کے مطابق الیکشن کمیشن سیاسی جاعت سے انتخابی نشان واپس لے سکتا ہے۔ انٹرا پارٹی الیکشن نہ کرانے پر انتخابی نشان واپس لیا جا سکتا ہے۔فیصلے میں مزید کہا گیا ہے کہ الیکشن کمیشن نے پی ٹی آئی کو متعدد شوکاز نوٹس جاری کئے، شوکاز نوٹس کے باوجود پی ٹی آئی نے انٹرا پارٹی الیکشن نہیں کرائے۔ الیکشن کمیشن کی اپیل منظور کرتے ہوئے پشاور ہائیکورٹ کا فیصلہ کالعدم قرار دیا جاتا ہے۔ پشاور ہائیکورٹ نے الیکشن کمیشن کی 14 شکایات پر فیصلہ کالعدم قرار دیا تھا۔
