سپریم کورٹ نے نیب ترامیم کیس کی اکتیس اکتوبر کی سماعت کا تحریری حکمنامہ جاری کردیا،عدالت نے چیئرمین پی ٹی آئی کو عدالت پیش ہونے کا موقع فراہم کردیا،آرڈر میں تحریر کیا گیاہےکہ اگر چیئرمین پی ٹی آئی عدالت میں پیش ہونا چاہیں تو جیل سپرنٹنڈنٹ انتظامات کریں.تفصیلات کے مطابق نیب ترامیم کالعدم قرار دینے کے فیصلے کے خلاف دائر اپیلوں پر اکتیس اکتوبر کو ہونے والی سماعت کا تحریری حکمنامہ جاری کر دیا گیا،نیب ترامیم کیس کی سماعت چیف جسٹس قاضی فائز عیسی کی سربراہی میں پانچ رکنی لارجر بینچ نے کی تھی،چیئرمین پی ٹی آئی نیب ترامیم کیس میں مرکزی درخواست گزار ہیں.سپریم کورٹ نے چیئرمین پی ٹی آئی کو عدالت میں پیش ہونے کا موقع فراہم کرتے ہوئے تمام فریقین کو نوٹس جاری کردئیے۔تحریری حکمنامے میں کہا گیا کہ عدالتی حکم کی نقول اڈیالہ جیل میں قید چیئرمین پی ٹی آئی کو پہنچائی جائیں ،اگر چیئرمین پی ٹی آئی عدالت میں پیش ہونا چاہیں تو جیل سپرنٹنڈنٹ انتظامات کریں جبکہ چیئرمین پی ٹی آئی کو نوٹس جیل سپرنٹنڈنٹ کے ذریعے بھیجا جائے گا،نیب ترامیم فیصلے کیخلاف سماعت سپریم کورٹ پریکٹس اینڈ پروسیجر کے تفصیلی فیصلے سے مشروط ہے۔
