پاکستان کے معروف گلوکار اسد عباس انتقال کر گئے ہیں ۔تفصیلات کے مطابق اسد عباس طویل عرصہ سے گردوں کی بیماری میں مبتلا تھے ، ان کے انتقال کی تصدیق گلوکار کے بھائی حیدر عباس کی جانب سے کی گئی ہے ، اسد عباس کا تعلق فیصل آباد سے تھا اور وہ تمغہ امتیاز بھی رکھتے تھے ۔اسد عباس طویل عرصہ سے گردوں کا علاج کر وا رہے تھے ، گزشتہ رات وہ بیماری بڑھنے سے کومہ میں چلے گئے اور بعدازاںخالق حقیقی سے جاملے ۔اسد عباس کی جانب سے حکومت سے مدد کی اپیل بھی کی گئی تھی، ڈاکٹرز نے کڈنی ٹرانسپلانٹ کا مشورہ دیا تھا جس کیلئے پانچ کروڑ روپے کی ضرورت تھی ۔اسد عباس نے اپنے آخری انٹرویو میں بتایا تھا کہ انہیں ہفتے میں پانچ بار ڈائلسز کروانے ہوتے ہیں ، انہوں نے اس وقت بتایا تھا کہ اس بیماری کا علم اس وقت ہوا جب انہیں بلڈ پریشر کا مسئلہ درپیش آیا ، جب ٹیسٹ کیئے گئے تو معلوم ہواکہ دونوں گردے فیل ہو چکے ہیں ۔بیماری کا علم ہونے کے بعد اسد عباس نے تقریبا ڈیڑھ سال اسلام آباد میں اپنا علاج کروایا لیکن پھر ڈاکٹروں کے مشورے پر کڈنی ٹرانسپلانٹ کی کوششیں شروع کر دیں، ان کے کئی رشتہ داروں نے کڈنی میچ کیلئے ٹیسٹ کروائے لیکن صرف ان کے بھائی کی کڈنی میچ ہوئی ، بھائی نے اپناایک گردہ اپنے علیل بھائی کو دیدیا ،اس علاج میں تقریبا انہیں پانچ کروڑ روپے خرچ ہوئے جس کے بعد انہیں آبائی شہر فیصل آباد منتقل کر دیا گیا ، لیکن کچھ عرصہ کے بعد ان کی کڈنی دوبارہ فیل ہو گئی اور تب سے وہ ڈائلسز پر تھے ۔
