سرمایہ کاروں نے اجارہ سکوک بانڈز کے ذریعے حکومتی توقعات سے 16گنا زائد سرمایہ فراہم کردیا۔ حکومت نے اجارہ سکوک بانڈز کی نیلامی کے ذریعے 30 ارب ڈالر کا سرمایہ اکٹھا کرنے کا ہدف مقرر کیا تھا۔پہلے ہی روز 479 ارب روپے جمع ہوگئے، یہ غیر سرکاری اعداد و شمار پاکستان اسٹاک ایکسچینج کے ذریعے کی گئی نیلامی کے ہیں، جو کہ اس سے قبل اسٹیٹ بینک میں کی جاتی تھی۔کرنسی مارکیٹ کے حکام کا کہنا ہے کہ پاکستان اسٹاک ایکسچینج میں نیلامی نے بانڈ مارکیٹ میں بینک کی اجارہ داری کو ختم کر دیا ہے۔ اب وہ بھاری منافع جو بینک لے رہے تھے، عام آدمی بھی حاصل کرسکے گا، کیوں کہ اسٹاک مارکیٹ کم از کم 5 ہزار روپے کے عوض بانڈ فراہم کر رہی ہے۔خیال رہے کہ نگران وزیراعظم انوارالحق کاکڑ نے جمعے کی صبح پاکستان اسٹاک ایکسچینج میں سکوک بانڈز کی نیلامی کا آغاز کیا، نگران وزیر خزانہ ڈاکٹر شمشاد اختر و دیگر حکام بھی ان کے ہمراہ تھے۔
