کراچی میں شہریوں نے ڈکیتی مزاحمت پر 30 سالہ نوجوان کو قتل کرنے والے ڈاکو ؤں کو تشدد کر کے موقع پر ہی ہلاک کر دیا ۔نجی ٹی وی کے مطابق اورنگی ٹاؤن سیکٹر ون ڈی قذافی چوک نزد برکت ہسپتال کے قریب ڈاکوؤں نے لوٹ مار کے دوران مزاحمت پر دکاندار 30 سالہ شہروز کو فائرنگ کر کے قتل کر دیا۔واقعے کے بعد علاقہ مکینوں نے ڈاکوؤں کو گھیر کر بدترین تشدد کا نشانہ بنایا جس پر انہیں زخمی حالت میں عباسی شہید ہسپتال منتقل کیا گیا لیکن تینوں ڈاکو زخموں کی تاب نہ لاتے ہوئے چل بسے۔دوسری جانب سرجانی ٹاؤن میں سیمنٹ ڈپو کے مالک نے لوٹ مار کرنے والے 2 ڈاکوؤں کو فائرنگ کر کے زخمی کیا جس کے بعد انہیں شہریوں نے تشدد کا نشانہ بنایا تاہم انہیں ہسپتال منتقل کیا گیا لیکن دونوں ڈاکو جان کی بازی ہار گئے۔عباسی شہید ہسپتال میں مقتول شہروز کے والد اسلم نے میڈیا سے بات چیت کرتے ہوئے بتایا کہ ڈکیتی کی وارداتیں روز کا معمول ہے ، ہمارے روڈ پر ہر ماہ اوسطاً 20 وارداتیں ہوتی ہیں اور اس سے پہلے شہروز کو تین چار بار لٹ چکا ہے جبکہ پچھلے ماہ اُسے ڈکیتوں نے دو بار لوٹا تھا۔والد نے کہا کہ شہررز تنگ آگیا تھا جس نے غصے میں ایک ڈاکو کو پکڑ لیا تو دوسرے نے اُسے گولیاں ماردیں۔ انہوں نے الزام عائد کیا کہ ہفتے والے دن پولیس اتنا آتی ہے کہ کباڑیوں سے پچاس ، پچاس روپے لیکر جاتی ہے مگر امن و امان کیلیے کوئی اقدامات نہیں کرتی۔
