پشاور سے کینٹ سٹیشن پہنچنے والی عوامی ایکسپریس میں بم ملنے کے معاملے پر اہم پیشرفت ہوئی ہے، پولیس کی جانب سے بم برآمد ہونے کی ابتدائی تحقیقات مکمل کرلی گئی ہیں اور پولیس کا دعویٰ ہے کہ بم نے دوپہر کو سکھر سٹیشن پر پھٹنا تھا۔ریلوے پولیس کے مطابق سٹیشن پر عوامی ایکسپریس کی سیٹ کے نیچے رکھے ایک بیگ میں بم برآمد ہوا تھا جس میں بیٹری نما چیز تھی ، تاریں لگی ہوئی تھیں۔بعد ازاں، بم ڈسپوزل سکواڈ نے اس بات کی تصدیق کی کہ بیگ سے برآمد ہونے والی بیٹری نما چیز بم تھا اور اسے ناکارہ بنادیاگیا۔ڈی آئی جی ساؤتھ اسد رضا نے بتایا کہ ٹرین پشاور سے کراچی پہنچی تھی اور بم پشاور سٹیشن پر رکھا گیا تھا، بم میں ٹائمر دوپہر 12 بجے کا لگا تھا، دوپہر 12 بجے ٹرین سکھر اور روہڑی جنکشن پر تھی،لیکن وہاں دھماکہ نہیں ہوسکا۔ڈی آئی جی نے کہا کہ کینٹ سٹیشن پہنچنے کے ایک گھنٹے بعد ٹرین میں بم کی موجودگی کی اطلاع ملی، ہم پشاور سے کراچی تک تمام ریلوے سٹیشنز کی سی سی ٹی وی فوٹیجز حاصل کررہے ہیں، ملزمان کے خلاف کینٹ سٹیشن تھانے میں مقدمہ درج کیا جائے گا۔
