ایران نے جاپانی ٹینکر پر ڈرون حملے کا امریکی الزام مستردکر دیا، یادرہے کہ امریکا نے ابتدائی طور پر بھارتی ساحل کے قریب نشانہ بننے والے جاپانی ٹینکر پر حملے کا الزام ایران پر عائد کیا تھا۔غیر ملکی خبررساں ایجنسی کے مطابق گزشتہ ہفتے بھارتی ساحل کے قریب سمندر میں جاپانی ٹینکر پر ڈرون حملہ کیا گیا تھا، ڈرون حملے کے نتیجے میں جہاز میں آگ لگ گئی تھی جبکہ جہاز کا عملہ محفوظ رہا۔جہاز پیر کو ممبئی کے ساحل کے قریب پہنچا جہاں بھارتی نیوی ٹیم نے معائنہ کیا، ٹیم نے ابتدائی رپورٹ میں ٹینکر پر ڈرون حملے کی نشاندہی کی تاہم ایرانی وزارت خارجہ نے بیان جاری کرتے ہوئے کہا ہے کہ ٹینکر کو نشانہ بنانے کا الزام بے کار ہے،اسے مسترد کرتے ہیں، ایسے الزامات لوگوں کی توجہ ہٹانے کی کوشش ہیں۔ایرانی وزارت خارجہ کا کہنا ہے کہ ایسے الزام غزہ میں صیہونی حکومت کے جرائم کی امریکی حمایت پر پردہ ڈالنے کے لیے ہیں، واضح رہے کہ جاپانی ٹینکر پر حملہ ایسے وقت کیا گیا جب حوثی بحیرہ احمر میں ڈرون اور میزائل حملے کر رہے ہیں۔
