مسٹری اسپنر ابرار احمد نے انجری سے نجات کےلیے ڈاکٹرز کی ہدایت پر عمل نہیں کیا جس کی وجہ سے وہ دورہ آسٹریلیا پر کوئی میچ نہ کھیل سکے۔ابرار احمد نے انجری سے نجات کےلیے ڈاکٹرز کی ہدایت نظر انداز کردی، جس کی وجہ سے وہ دورہ آسٹریلیا پر دوبارہ انجری کا شکار ہوگئے اور کوئی میچ نہ کھیل سکے۔ پی سی بی میڈیکل پینل نے ابرار کی انجری پر رپورٹ تیار کرلی جس میں کہا گیا کہ بھارت میں ہونے والے ورلڈ کپ میں جب ٹیم حیدرآباد دکن میں تھی تو ابرار احمد نے سیدھے ہیپس میں تکلیف کی شکایت کی جس پر فوری طور پر ان کے ٹیسٹ کروائے گئے جس میں ان کے عرق النسا (شیاٹک) کی تشخیص ہوئی۔اس کے بعد میڈیکل پینل نے ان کی انجری سے نجات کےلیے انہیں ایک پلان بنا کر دیا جس میں مختلف ایکسرسائز اور ڈرل پر پابندی سے عمل کرنے کی ہدایت کی گئی۔رپورٹ میں بتایا گیا کہ انہوں نے ہدایت پر عمل نہیں کیا جس پر بھارت میں ہی ایک بار پھر ٹیم منجمنٹ کے ساتھ میٹنگ کرکے انہیں ہدایات پر عمل کرنے کو کہا گیا لیکن بدقسمتی سے انہوں نے بتائی گئی ہدایات پر پھر سے مکمل عمل نہیں کیا۔یہ ہی وجہ تھی کے دورہ آسٹریلیا کے پریکٹس میچ کے دوران وہ دوبارہ ان فٹ ہوگئے۔ آسٹریلیا سے واپسی کے بعد ابرار احمد ان دنوں نیشنل اکیڈمی لاہور میں رہب پروگرام سے گزر رہے ہیں۔پی سی بی میڈیکل پینل نے ابرار کی انجری کی رپورٹ پی سی بی میں جمع کروادی۔
