چیئرمین پیپلزپارٹی بلاول بھٹو زرداری کا کہناہےکہ میاں صاحب چوتھی بار وزیراعظم بنے تو وہ انتقام لیں گے جس کا اندازہ ہی نہیں، ان کی سیاست تشدد کی سیاست ہے۔میں انتقامی سیاست کو ختم کرنے کے لیے میدان میں اترا ہوں ، اس ملک کو نفرت کی سیاست نے تقسیم کیا ہے،نفرت کی سیاست نے بھائی کو بھائی سے لڑایا،ہرادارے کو تقسیم کیا۔چنیوٹ میں جلسے سے خطاب میں ان کا مزید کہنا تھا کہ سیاستدان آپس میں لڑتے رہیں گے تو ملک کے مخالفین فائدہ اٹھا ئینگے،وزیرخارجہ رہاہوں،جانتاہوں دنیا میں پاکستان کیخلاف کیا کیا سازشیں ہورہی ہیں،میں جانتا ہوں کس طرح اٹھارہ ماہ وزیر خارجہ رہا ہوں ،پاکستان تاریخ کے بدترین معاشی بحران سے گزر رہا ہے ، پرانے سیاستدانوں کی سیاست انتقام کی شکل اختیار کر چکی ہے جسے ختم کرنا ہوگا ، پاکستان پیپلز پارٹی نے کبھی انتقامی سیاست نہیں کی بلکہ شہادت قبول کی ہے ، بینظیر بھٹو شہید اور ذوالفقار علی بھٹو شہید نے غریب عوام کے حقوق کے لیے اقدامات کیے ۔ان کا مزید کہنا تھا کہ پیپلز پارٹی نے ہمیشہ عوام کے حقوق کی جنگ لڑی ہے اور لڑتی رہے گی ، میری حکومت میں سیاسی انتقام نہیں لیا جائے گا اور نہ ہی سیاسی کارکنوں کی گرفتاری ہوگی ، میری حکومت میں خواتین کے ساتھ ظلم و زیادتی نہیں ہوگی اور نہ ہی نفرت کو پروان چڑھایا جائے گا ، اپنے دس نکاتی ایجنڈا پر عملدرآمد کروں گا اور کرواؤں گا ، ہم اقتدار میں آ کر انتقام کی سیاست کا ہمیشہ ہمیشہ کیلئے خاتمہ کرینگے ، غریب عوام کو 300 یونٹ مفت بجلی کی فراہمی کا وعدہ کرتا ہوں ، عوام ہمیں موقع دیں اور تیر پر ٹھپا لگائیں تو کئے گئے وعدوں کی تکمیل کا اعلان کرتا ہوں ، سندھ کے سیلاب متاثرین کیلئے 30 لاکھ پکے گھروں کی تعمیر اور مالکانہ حقوق دیئے جارہے ہیں۔
