بھارتی دارالحکومت نئی دہلی میں ایک آدمی نے میٹرو ٹرین کے آگے کود کر خودکشی کر لی۔ ہندوستان ٹائمز کے مطابق خودکشی کرنے والے شخص کی شناخت اجتیش سنگھ بتائی گئی ہے جس نے آئی این اے سٹیشن پر چلتی ٹرین کے آگے چھلانگ لگائی۔ پولیس کی طرف سے بتایا گیا ہے کہ متوفی کی عمر 30سال تھی۔ سٹیشن کے سی سی ٹی وی کیمرے نے اس کے ٹرین کے آگے کودنے کا منظر محفوظ کر لیا۔ پولیس نے یہ فوٹیج حاصل کر لی ہے۔ پولیس کو متوفی کے پاس سے اس کا موبائل فون ملا، جس پر بعد ازاں آنے والی ایک کال کے ذریعے اس کی شناخت ہوئی۔ پولیس واقعے کی مزید تحقیقات کر رہی ہے۔
