ایف آئی اے، پاسپورٹ اینڈ امیگریشن اور نیکٹا حکام نے بتایا کہ ملک میں اس وقت 80 کالعدم جماعتیں عملی طور پر موجود ہیں، ایف آئی اے نے ایک سال میں توہین مذہب کے70 اورہراسمنٹ کے 518 کیسز رجسٹر کئے،ملک میں پاسپورٹ کا بیک لاگ ایک لاکھ 65 ہزارہے۔سینیٹرفیصل سلیم کی زیرصدارت قائمہ کمیٹی برائے داخلہ کا اجلاس ہوا جس میں ایف آئی اے، پاسپورٹ اینڈ امیگریشن اور نیکٹا حکام نے بریفنگ دی۔ ڈی جی ایف آئی اے احمد اسحاق نے بریفنگ میں بتایا کہ بجلی چوری پر819 ملین کا نقصان روکا اور560 ملین ریکورکئے۔سینیٹرعبدالقادرنے کہا کہ حکومت 580 ارب کی بجلی چوری کا بتارہی جبکہ ایف آئی اے ملینزمیں ریکوری کا کہہ رہے، ڈی جی پاسپورٹ اینڈ امیگریشن مصطفی جمال قاضی نے بریفنگ میں بتایاکہ ایک سال میں ادارے نے45 ارب روپے کا ریونیو اکٹھا کیا۔انہوں نے بتایا کہ آئندہ ہدف 90 ارب دیا گیا ہے جبکہ پاسپورٹ کا بیک لاگ ایک لاکھ 65 ہزارہے پاسپورٹ ایشوہونے سے متعلق اوورسیزکا کوئی بیک لاگ نہیں ہے۔کوآرڈینیٹرنیکٹا رائے طاہرنے بتایا کہ پاکستان میں 80 کالعدم جماعتیں ہیں، کالعدم تنظیموں کے لیڈروں کی تفصیلات بھی موجود ہیں۔ اس موقع پر سنیٹرشہادت اعوان اورسینیٹرعرفان صدیقی نے بغیروارنٹ شہری کی گرفتاری پرتشویش کا اظہارکیا۔
