منہاج القران کے سربراہ اور معروف مذہبی سکالر پروفیسر ڈاکٹر علامہ طاہر القادری جاپان کے5روزہ دورے پر 28 اگست کو جاپان پہنچ رہے ہیں۔اپنے دورہ جاپان میں علامہ طاہر القادری بڑے اجتماع سے خطاب بھی کریں گےجس کے لیے تمام انتظامات مکمل کرلیے گئے ہیں۔”جنگ ” کے مطابق تحریک منہاج القران جاپان کے صدر ملک ممتاز نے کہا ہے کہ طاہر القادری کا جاپان کا یہ دورہ تاریخی ہوگا، اس دورے میں سب سے اہم پیس اینڈ یونٹی کانفرنس کا انعقاد ہوگا جس میں 1500 افراد کے لیے جاپان کے گما کین کے اوتا سٹی میں ہال بک کرلیا گیا ہے۔ ڈاکٹر طاہر القادری 20 سال کے طویل وقفے کے بعد جاپان آ رہے ہیں، ان کے ساتھ ان کے دونوں صاحبزادے ڈاکٹر حسن قادری اور ڈاکٹر حسین قادری کے علاوہ ان کے پوتے شیخ حماد بھی ہوں گے۔انہوں نے بتایا کہ ان کے دورے کے انتظامات منہاج القران جاپان اور منہاج القران ایشیاء کونسل کے صدر علی عمران اور ڈائریکٹر منہاج القران جاپان رانا نفیس قادری کررہے ہیں جبکہ جاپان میں پاکستان کے سفیر رضا بشیر تارڑ کو بھی پیس اینڈ یونٹی کانفرنس میں شرکت کی دعوت دی گئی ہے۔اس کے علاوہ جاپان میں پاکستان کی تمام سیاسی جماعتوں کے رہنماؤں کو بھی شرکت کی دعوت دی گئی ہے۔
