پاکستان مسلم لیگ (ن) کے قائد میاں نواز شریف نے کہا ہے کہ پنجاب کے ضمنی انتخابات میں پی ٹی آئی نے بائیکاٹ کا دعویٰ کیا، مگر یہ کیسا بائیکاٹ تھا جب عمر ایوب کی اہلیہ خود الیکشن میں حصہ لے رہی تھیں؟
نومنتخب اراکینِ اسمبلی سے خطاب کرتے ہوئے ان کا کہنا تھا کہ تحریکِ انصاف کے دورِ حکومت نے ملک کو صرف تباہی دی، بدتمیزی اور بےادبی کا کلچر فروغ پایا اور پاکستان دیوالیہ ہونے کے قریب پہنچ گیا۔ پی ٹی آئی نے اپنے دور میں مہنگائی کو 39 فیصد تک پہنچایا جبکہ ہمارے دور میں مہنگائی صرف 3 فیصد تھی۔ اگر ترقی کا سفر نہ رکا ہوتا تو آج پاکستان دنیا میں ایک معتبر مقام رکھتا اور آئی ایم ایف کی فکر نہ ہوتی۔
انہوں نے مزید کہا کہ 2018 سے 2022 تک جو کچھ بھی ہوا، اس کی ذمہ دار پی ٹی آئی ہے۔ نفرت، جھوٹ اور فساد کی سیاست پی ٹی آئی نے متعارف کروائی۔ ایسے ماحول میں ملک کیسے ترقی کرسکتا تھا؟ گزشتہ حکومت میں میرٹ کو بالکل نظرانداز کیا گیا۔ بانی پی ٹی آئی اکیلے مجرم نہیں، بلکہ وہ لوگ بھی مجرم ہیں جو انہیں لے کر آئے۔
نواز شریف کا کہنا تھا کہ ضمنی انتخابات میں پی ٹی آئی بائیکاٹ کا نعرہ لگا رہی تھی، مگر اسی دوران عمر ایوب کی بیگم الیکشن لڑ رہی تھیں۔ عوام نے ضمنی انتخابات میں جھوٹ، نفرت اور بدتہذیبی کی سیاست کو مسترد کردیا۔ میں نومنتخب اراکین کو مبارکباد دیتا ہوں کہ آپ نے گالی گلوچ اور فتنہ کی سیاست کو شکست دی۔
انہوں نے کہا کہ آج ملک میں میرٹ پر کام ہورہا ہے، ترقیاتی منصوبے جاری ہیں، لیپ ٹاپ تقسیم کیے جارہے ہیں، سڑکیں بن رہی ہیں، گرین بسیں چل رہی ہیں، امن و امان بہتر ہوا ہے اور مذہب کی تفریق کے بغیر راشن کارڈ جاری کیے جارہے ہیں۔ مزید عوامی منصوبے بھی جلد سامنے آئیں گے۔
