ایران نے اگلے ہفتے واشنگٹن، ڈی سی میں ہونے والی 2026 ورلڈ کپ ڈرا تقریب کا بائیکاٹ کرنے کا فیصلہ کیا ہے۔ سرکاری خبر رساں ایجنسی ایرنا کے مطابق یہ اقدام اس وقت سامنے آیا جب امریکی حکام نے ایرانی وفد کے متعدد ارکان کو ویزا جاری کرنے سے انکار کردیا۔
ایرانی فٹبال فیڈریشن کے ترجمان، امیر مہدی علوی نے بتایا کہ ویزا کے معاملات میں پیش آنے والی رکاوٹیں محض کھیل تک محدود نہیں بلکہ غیر معمولی نوعیت کی ہیں۔ اس حوالے سے وائٹ ہاؤس کی جانب سے فوری طور پر کوئی ردِعمل سامنے نہیں آیا۔
علوی کے مطابق فیڈریشن نے صورتحال کے حل کی کوشش میں فیفا سے رابطہ کیا ہے، تاہم عالمی تنظیم نے بھی تاحال اس بارے میں کوئی جواب نہیں دیا۔ واضح رہے کہ امریکی انتظامیہ نے جون میں صدر ڈونلڈ ٹرمپ کے دورِ حکومت میں 12 ممالک، بشمول ایران، کے شہریوں پر سفری پابندیاں عائد کی تھیں۔ اس فہرست میں وہ ملک ہیٹی بھی شامل تھا جس نے حال ہی میں ورلڈ کپ میں جگہ بنائی ہے۔
اگرچہ امریکی حکام نے اعلان کیا تھا کہ بڑی کھیلوں کی عالمی تقریبات، جیسے ورلڈ کپ اور اولمپکس، میں شرکت کرنے والے کھلاڑیوں، کوچز اور معاون عملے کو اس پابندی سے استثنا دیا جائے گا، لیکن یہ واضح نہیں کہ آیا یہ رعایت ورلڈ کپ ڈرا کے لیے بھی لاگو ہوتی ہے یا نہیں۔ ڈرا کی تقریب 5 دسمبر کو کینیڈی سینٹر میں منعقد ہوگی۔
ایرانی وفد کی قیادت فٹبال فیڈریشن کے صدر مہدی تاج کے کرنے کی توقع تھی، جو ایشیائی فٹبال کے سینئر ترین عہدیداروں میں شمار ہوتے ہیں اور فیفا کی دو اہم کمیٹیوں کے رکن بھی ہیں، جن کا تعلق ورلڈ کپ کی نگرانی اور مردوں کی قومی ٹیموں کے انتظامی معاملات سے ہے۔
یاد رہے کہ 2026 کا ورلڈ کپ پہلی مرتبہ 48 ٹیموں پر مشتمل ہوگا اور اسے امریکا، کینیڈا اور میکسیکو مشترکہ طور پر 11 جون سے 19 جولائی تک میزبانی کریں گے۔
