حکومت نے گزشتہ شب پیٹرول کی فی لیٹر قیمت میں 40 روپے تک کمی کا اعلان کیاہے لیکن آپ کو جان کر حیرت ہو گی کہ پیٹرول اور ڈیزل پر ایک مرتبہ پھر ٹیکسز اور مارجن میں اضافہ کر دیا گیاہے ۔نجی ٹی وی کے مطابق دستاویز میں یہ بات سامنے آئی کہ حکومت نے ہائی سپیڈ ڈیزل پر پیٹرولیم لیوی میں 5 روپے فی لیٹر اضافہ کردیا ہے۔ علاوہ ازیں ہائی سپیڈ ڈیزل پر لیوی کی شرح 50 روپے سے بڑھا کر 55 روپے فی لیٹر مقرر کردی گئی ہے۔پیٹرول پر لیوی کی شرح 60 روپے فی لیٹر برقرار رکھی گئی ہے جب کہ پیٹرول پر او ایم سی مارجن میں 47 پیسے کا اضافہ کیا گیا ہے۔ پیٹرول پر فی لیٹر مارجن 7.41 روپے مقرر کیا گیا ہے۔ ڈیلر مارجن بھی 41 پیسے بڑھا دیا گیا ہے، جس کے بعد پیٹرول پر ڈیلر مارجن 8 روپے 23 پیسے لیٹر مقرر ہوگیا۔
