توشہ خانہ کیس میں مسلم لیگ (ن) کے قائد نواز شریف کی وارنٹ معطلی کی درخواست پر فیصلہ محفوظ کر لیا گیا۔ نجی ٹی وی کے مطابق اسلام آباد کی احتساب عدالت نے نوازشریف کی توشہ خانہ کیس میں وارنٹ معطلی کی درخواست پر سماعت کی۔ نوازشریف کے وکیل قاضی مصباح نے عدالت کے روبرو دلائل دیتے ہوئے کہا کہ نوازشریف عدالت پیش ہونا چاہتے ہیں، 21 اکتوبر کو وطن واپس لوٹ رہے ہیں ان کے وارنٹ گرفتاری معطل کر دیئے جائیں۔جج محمد بشیر نے استفسار کیا کہ کیا ہائیکورٹ میں اس کیس سے متعلق حفاظتی ضمانت دائر کی گئی جس پر وکیل نے کہا کہ توشہ خانہ کیس میں وارنٹ جاری کئے گئے تھے، فیصلہ جاری نہیں ہوا۔نیب کے وکیل نے موقف اختیار کیا کہ نوازشریف عدالت سے دو مختلف ریلیف مانگ رہے ہیں کہ عدالت کے سامنے سرنڈر کرنا چاہتے ہیں اور وطن پاکستان واپس آنا چاہتے ہیں اور وارنٹ 24 اکتوبر تک معطل کر دیں۔عدالت نے دونوں جانب سے وکلا کے دلائل سننے کے بعد وارنٹ معطل کرنے کی درخواست پر فیصلہ محفوظ کر لیا۔
