ایران میں صحافیوں نیلوفر حامدی اور الھہ محمدی کو ریاست اور قومی سلامتی کے خلاف کام کرنے کے جرم میں بالترتیب 13 اور 12 سال قید کی سزا سنادی گئی۔ دونوں پر امریکی حکومت کے ساتھ ساز باز کرکے قومی سلامتی کے منافی سرگرمیوں میں ملوث ہونے کے الزامات ثابت ہونے پر سزائیں سنائی گئیں۔عدالتی فیصلے میں کہا گیا ہے کہ پہلے کیس میں دشمن ملک امریکہ کے ساتھ ساز باز کرنے پر نیلوفر حامدی کو 7 سال اور الھہ محمدی کو 6 سال قید کی سزا سنائی گئی۔اسی طرح ’’قومی سلامتی کے خلاف‘‘ کام کرنے کے دوسرے الزام میں پانچ پانچ اور نظام کے خلاف پروپیگنڈہ کرنے کے جرم میں ایک ایک سال کی قید کی سزا سنائی گئی۔خیال رہے کہ نیلوفر حامدی کو اس وقت حراست میں لیا گیا تھا جب انہوں نے تہران کے ایک ہسپتال میں مھسا امینی کے والدین کی ایک دوسرے سے گلے ملتے ہوئے تصویر کھینچی تھی جس کے بعد مھسا امینی کی زیر حراست موت کا واقعہ پوری دنیا میں اجاگر ہوا تھا۔اسی طرح الھہ محمدی کو ان کے کرد آبائی شہر ساقیز میں مھسا امینی کے جنازے اور اس کے بعد ہونے والے احتجاجی مظاہرے کی کوریج کرنے پر گرفتار کیا گیا تھا۔
