جنوبی امریکہ کے ملک چلی میں ایک ٹک ٹاکر لڑکی کو دن دیہاڑے سڑک پر گولی مار کر موت کے گھاٹ اتار دیا گیا۔ ڈیلی سٹار کے مطابق یہ واردات چلی کے دارالحکومت سین تیاگو میں ہوئی۔ 24سالہ سبرینا ڈورین نامی ٹک ٹاکر نیل سیلون جا رہی تھی، جب اسے گولیاں مار ی گئیں۔سبرینا خود جرائم پیشہ لڑکی تھی اور کار چوری و منشیات سمگلنگ جیسے جرائم میں قید کی سزا کاٹ کر چند دن پہلے ہی جیل سے رہا ہوئی تھی۔سوشل میڈیا پر اس نے ’بیڈ گرل‘ کے امیج کے ساتھ شہرت پائی۔ اس کے ٹک ٹاک اکاﺅنٹ پر ساڑھے 3لاکھ سے زائد فالوورز تھے۔سبرینا کو دو نقاب پوش ملزمان نے 8گولیاں ماریں اور سبرینا ہی کی کار میں جائے واردات سے فرار ہو گئے۔ پولیس کے مطابق سبرینا کی موقع پر ہی موت واقع ہو گئی۔ نامعلوم ملزمان کے خلاف مقدمہ درج کر لیا گیا ہے اور ان کی شناخت کی کوشش کی جا رہی ہے۔
