بھارتی ریاست اتر پردیش کے ایٹا ضلع میں ایک خاتون اپنے مرحوم باپ کی بیوی بن کر پنشن وصول کرتی رہی،پولیس کے مطابق خاتون کی شناخت محسنہ پرویز کے نام سے ہوئی ہے جنہیں پولیس نے گرفتار کر لیا ہے۔پولیس کے مطابق محسنہ پرویز نے 10 سال کے عرصے میں 12 لاکھ روپے کی رقم وصول کی۔علی گنج کے رہنے والے وجرت اللہ خان 30 نومبر 1987 کو لیکھپال (سرویئر) کے عہدے سے ریٹائر ہوئے تھے اور 2 جنوری 2013 کو ان کا انتقال ہوگیا۔ ان کی اہلیہ ساویہ بیگم ان سے پہلے ہی فوت ہو چکی تھیں۔اپنے والد کی موت کے بعد بیٹی محسنہ پرویز نے خود کو اپنے والد کی بیوی کے طور پر طاہر کرنے کے لیے جعلی دستاویزات تیار کیں اور پنشن کی مراعات جمع کرنا شروع کر دیں۔پولیس کے مطابق یہ کارروائی خاتون کے شوہر کی شکایت پر کی گئی ہے۔پولیس کا کہنا ہے کہ شوہر کو اس دھوکہ دہی کا علم تھا اور اس نے بیوی سے جھگڑے کے بعد شکایت درج کرائی۔
