اسپین نے جرمنی کو 0-3 سے ہرا کر ویمنز نیشنز لیگ کا ٹائٹل دوبارہ اپنے نام کرلیا
اسپین کی ویمنز فٹبال ٹیم نے شاندار اور دبنگ کارکردگی پیش کرتے ہوئے ویمنز نیشنز لیگ 2025 کا ٹائٹل ایک مرتبہ پھر اپنے نام کرلیا۔ میڈرڈ میں کھیلے گئے فیصلہ کن دوسرے لیگ فائنل میں اسپین نے جرمنی کو 0-3 سے شکست دے کر ایونٹ اپنے نام کیا۔
پہلا لیگ برابر، دوسرا اسپین کے نام
پہلا میچ جرمنی کے شہر کائسریس لاؤٹن میں بغیر کسی گول کے برابر رہا تھا، باوجود اس کے کہ جرمنی نے جارحانہ کھیل پیش کیا۔ تاہم موقع ضائع کرنا جرمنی کو مہنگا پڑا اور دوسرے لیگ میں اسپین نے پورا میچ اپنے کنٹرول میں لے لیا۔
میڈرڈ میں اسپین کی شاندار واپسی
میڈرڈ میں صورتحال یکسر اسپین کے حق میں ہوگئی۔ میزبان ٹیم نے ابتدا سے ہی دباؤ ڈالے رکھا لیکن جرمن گول کیپر این-کترین برگر نے حیرت انگیز بچاؤ کرتے ہوئے اسپین کو طویل وقت تک گول کرنے سے روکے رکھا۔
کلاؤڈیا پینا کا جادو، وِکی لوپیز کا کمال
آخرکار 61ویں منٹ میں اسپین کا انتظار ختم ہوا جب کلاؤڈیا پینا نے شاندار فائرنگ کے ساتھ پہلا گول اسکور کیا۔
صرف سات منٹ بعد وِکی لوپیز نے دوسرا گول کرکے جرمنی کے لیے مشکلات بڑھا دیں۔
اس کے بعد 74ویں منٹ میں کلاؤڈیا پینا نے اپنا دوسرا گول داغ کر برتری 0-3 کر دی، جو میچ کے اختتام تک برقرار رہی۔
اسپین کا شاندار اعزاز
اس کامیابی کے ساتھ اسپین نے ایک بار پھر ثابت کردیا کہ وہ خواتین فٹبال کی یورپ کی مضبوط ترین ٹیموں میں سے ایک ہے اور نیشنز لیگ میں اس کی حکمرانی برقرار ہے۔
