بھارتی دارالحکومت نئی دہلی کے 100 سے زائد سکولوں کو بم سے اڑانے کی دھمکی موصول ہوئی ہے جس کے بعد سکول خالی کرالئے گئے۔ انڈین میڈیا کی رپورٹ کے مطابق بدھ کی صبح نئی دہلی کے 100سے زائد اور بھارتی شہر نوئیڈا کے 2 سکولوں کو ای میلز کے ذریعے بم دھماکے کی دھمکی موصول ہوئی۔رپورٹ میں بتایا گیا کہ دھمکی موصول ہونے کے بعد بم ڈسپوزل سکواڈ، فائر سروس کے اہلکار فوراً سکولوں میں پہنچ گئے اور عمارتوں کو خالی کرایا گیا۔ دھمکی ملنے کے بعد اساتذہ اور طلبہ میں خوف و ہراس پھیل گیا، تاہم سکول خالی کرواکر تمام بچوں اور عملے کو گھر بھیج دیا گیا۔بھارتی وزارت داخلہ کا دعویٰ ہے کہ ابتدائی تحقیقات کے مطابق سکولوں کوموصول ہونے والی ای میلز روس سے آئیں اور یہ تمام جھوٹی تھیں۔ وزارت داخلہ کی جانب سے جاری بیان میں کہا گیا ہے کہ گھبرانے کی ضرورت نہیں ہے۔ ای میلز محض جھوٹی اور مذاق لگ رہی ہیں، دہلی پولیس اور سکیورٹی ایجنسیاں پروٹوکول کے مطابق ضروری اقدامات کر رہی ہیں۔انڈیا ٹوڈے کی ایک رپورٹ میں نامعلوم ذرائع سے حاصل ہونے والی معلومات کا حوالہ دیتے ہوئے بتایا گیا ہے کہ ابتدائی تحقیقات میں معلوم ہوا ہے کہ ای میلز کا آئی پی ایڈریس روسی زبان کا تھاتاہم دہلی پولیس کو شبہ ہے کہ ای امیل کا اصل آئی پی ایڈریس ورچوئل پرائیویٹ نیٹ ورک کے ذریعے چھپایا گیا ہو۔
