کراچی کے علاقے اورنگی ٹاؤن میں خاتون کو گھر کے اندر چھریوں کے وار سے قتل کردیا گیا جبکہ پولیس نے دیور کو گرفتار کرلیا۔رپورٹ کے مطابق پولیس کا کہنا ہے کہ کراچی کے علاقے اورنگی ٹاؤن ایم پی آر کالونی کے ایک گھر سے خاتون کی لاش ملی ہے، جسے چھریوں کے وار کرکے قتل کیا گیا، مقتولہ کی شناخت اسما کے نام سے ہوئی ہے۔پولیس کے مطابق مقتولہ کے قتل میں شوہر اور دیور ملوث ہیں، مقتولہ کے 2 بچے ہیں۔ واقعہ میں ملوث ملزم زمین کو گرفتار کرلیا گیا، گرفتار ملزم مقتولہ کا دیور ہے۔پولیس نے ملزم کے قبضے سے آلہ قتل برآمد کرلیا ہے، واقعہ کے بعد شوہر اور دیگر فرار ہو گئے، مقتولہ کی لاش کو عباسی شہید ہسپتال منتقل کردیا گیا۔دوسری جانب کراچی کے علاقے سائٹ ایریا میں ڈکیتوں نے مزاحمت پر سیکیورٹی گارڈ کو قتل کردیا جس کے بعد رواں سال میں اب تک مزاحمت پر قتل ہونے والے شہریوں کی تعداد 67 تک پہنچ گئی۔سائٹ سپر ہائی تھانے کی حدود میں مسلح ڈکیتوں نے ڈیوٹی ختم کر کے واپس جانے والے سیکیورٹی گارڈ کو مزاحمت پر گولیاں مار کر قتل کردیا۔پولیس کےمطابق ملزمان نے لوٹنے کی کوشش کی تو گارڈ نے اسلحہ نکالا جس پر ملزمان نے فائرنگ کردی اور ایک گولی مقتول کے سینے میں لگی، مقتول کی شناخت فیصل کے نام سے ہوئی جس کی لاش کو ضابطے کی کارروائی کے لیے ہسپتال منتقل کردیا گیا۔پولیس نے وقوعہ سے خول و شواہد جمع کر کے تحقیقات شروع کردیں جبکہ واقعے کا مقدمہ مقتول سیکیورٹی گارڈ کے بھائی کی مدعیت میں سائٹ ایریا تھانے میں درج کرلیا گیا۔مقدمے میں قتل ،اقدام قتل اور ڈکیتی کی دفعات شامل کی گئی ہیں، ایف آئی آر متن کےمطابق فیصل ڈیوٹی سے گھر جارہاتھا کہ راستے میں ڈکیتوں نے اس سے لوٹ مار کی جس کے بعد قتل کردیا۔واضح رہے کہ رواں سال میں اب تک کراچی میں ڈکیتوں نے مزاحمت پر تقریبا 67 افراد کو قتل جبکہ سیکڑوں کو زخمی کردیا گیا۔
