فیڈرل انویسٹی گیشن ایجنسی (ایف آئی اے) کے اینٹی کرپشن سرکل اسلام آباد نے آن لائن جعلی ادویات کی فروخت میں ملوث ڈاکٹر سمیت 2 ملزمان کو گرفتار کرلیا۔رپورٹ کے مطابق ترجمان ایف آئی اے نے کہا کہ گرفتار ملزمان میں ڈاکٹر احمد فرحان اور عاطف فیاض شامل ہیں، ملزم احمد فرحان پمز ہسپتال میں بطور ایسوسی ایٹ پروفیسر تعینات تھا۔ترجمان ایف آئی اے کی جانب سے جاری بیان کے مطابق ملزمان آن لائن فارمیسی کے ذریعے بین شدہ اور غیر رجسٹرڈ ادویات فروخت کر رہے تھے۔ترجمان ایف آئی اے نے کہا کہ ملزمان نے اس مقصد کے لئے ایک ویب سائٹ بھی بنا رکھی تھی۔واضح رہے کہ مارچ میں وزارت نیشنل ہیلتھ سروسز نے دوا ساز کمپنیوں کو ہدایت کی تھی کہ وہ ایک ماہ کے اندر تمام مقامی اور درآمدی ادویات کی پیکیجنگ پر بارکوڈ پرنٹ کریں۔اسلام آباد میں ڈرگ ریگولیٹری اتھارٹی آف پاکستان (ڈریپ) پالیسی بورڈ نے ہدایت کی تھی کہ کمپنیاں 20 اپریل تک تمام فارماسیوٹیکل اور بائیولوجیکل ادویات کے لئے جاری کردہ ہدایات پر عمل درآمد کرنے کی پابند ہیں۔وزارت صحت کی طرف سے جاری کردہ ایک بیان میں کہا گیا تھا کہ یہ اقدام معیاری ادویات کی فراہمی اور جعلی ادویات کے خاتمے کو یقینی بنانے کے لئے اٹھایا گیا ہے۔بیان میں مزید کہا گیا تھا کہ بارکوڈز گلوبل شناختی کوڈ سسٹم کے طور پر کام کرےگا، جس سے شہری اپنے اسمارٹ فونز سے بارکوڈ سکین کرکے ادویات اور ان کی قیمتوں کی تصدیق کر سکیں گے۔یہ نظام تقریباً ایک دہائی سے کام کر رہا ہے، نیشنل ہیلتھ سسٹم کی وزارت اور ڈریپ نے 2015 میں بارکوڈ متعارف کرانے کے لئے کام کرنا شروع کیا تھا اور دعویٰ کیا تھا کہ یہ جعلی ادویات کی فروخت کو ختم کر دے گا۔دو سال بعد مارچ 2017 میں وزارت نے اعلان کیا تھا کہ اس منصوبے کو منظوری کے لئے وفاقی کابینہ کے اجلاس کے ایجنڈے میں شامل کیا گیا ہے۔وزارت صحت کے ایک عہدیدار نے کہا تھا کہ یہ بار کوڈ ڈپارٹمنٹل سٹورز جیسا ہی ہوگا جہاں مصنوعات کی قیمتوں کو سنگل ڈائمینشنل یا ون آئی ڈی بارکوڈز کے ذریعے چیک کیا جاتا ہے۔دوا ساز کمپنیاں ٹو ڈی بارکوڈز، جنہیں عام طور پر کیو آر کوڈز کے نام سے جانا جاتا ہے، دوائیوں کی پیکیجنگ پر استعمال کریں گے۔صارفین پراڈکٹ کے نام، اس کے بنانے والے نام، بیچ نمبر، وہ تاریخ جس کے بعد چیز استعمال کے قابل نہیں رہتی اور قیمت کے بارے میں معلومات حاصل کرنے کے لئے ٹوڈی بارکوڈز کو سکین کر سکیں گے۔انہوں نے کہا کہ جن شہریوں کے پاس سمارٹ فون نہیں ہیں وہ میڈیکل سٹور کے مالک یا کسی دوسرے شخص سے درخواست کر سکتے ہیں کہ وہ دوا کی تصدیق میں ان کی مدد کریں۔
