کراچی: نوجوان تاجر میر رضا قتل کیس میں اب تک کوئی پیشرفت نہیں ہو سکی۔تفتیشی ذرائع کے مطابق رات گئے تحقیقاتی کمیٹی کا فیروزآباد تھانے میں اجلاس ہوا، تحقیقاتی کمیٹی نے اجلاس کے بعد جائے وقوعہ کا دورہ بھی کیا، کمیٹی نے دورے کے لیے رات 3 سے 4 بجے کا وقت منتخب کیا۔ذرائع کا بتانا ہے ابتدائی تفتیش کے مطابق میر رضا 28 جولائی کی رات 3 سے 4 بجے کے درمیان لاپتا ہوا، تحقیقاتی کمیٹی نے منتخب کیے گئے وقت کے دوران جائے وقوعہ پر فائر کیا، فائر کا مقصد جائے وقوعہ سے اطراف کی آبادیوں تک فائر کی گونج کا اندازہ لگانا تھا، جائے وقوعہ سے قریب مسجد، نرسری اور دیگر مقامات پر موجود افراد سے پوچھ گچھ بھی کی گئی، جائے وقوعہ سے قریب موجود افراد میں سے کسی نے بھی فائر کی آواز نہیں سنی۔تفتیشی ذرائع کا کہنا ہے کہ 28 جولائی کو فائرنگ اسی جگہ پر کی گئی یا نہیں اس حوالے سے تحقیقات جاری ہیں، میر رضا کی دونوں ہتھیلیوں پر گن پاوڈر کی موجودگی پائی گئی ہے، اس حوالے سے بھی تحقیقات کی جارہی ہیں کہ میر رضا نے گن چلائی یا نہیں۔
