پاکستان اور ایران کے مابین مثبت پیغامات کا تبادلہ ہوا ہے جس کی دفتر خارجہ نے تصدیق کر دی۔نجی ٹی وی کے مطابق ترجمان دفتر خارجہ کا کہنا تھا کہ ایرانی سفارت کار اور ایڈیشنل سیکرٹری خارجہ میں مثبت پیغامات کا تبادلہ ہوا۔ اس دوران ایڈیشنل سیکرٹری خارجہ نے کہا کہ پاکستان اور ایران کے برادرانہ تعلقات ہیں، مثبت بات چیت کے ذریعے تمام مسائل کو حل کرنے کیلئے آگے بڑھیں گے۔ دہشت گردی سمیت مشترکہ چیلنجز کیلئے مربوط کارروائی کی ضرورت ہے۔ایرانی سفارتکار کا اس موقع پر کہنا تھا کہ دونوں ممالک میں حالیہ تناو کا فائدہ دشمنوں اور دہشت گردوں سے ہو گا۔ آج مسلم دنیا کا اہم مسئلہ غزہ میں صیہونیوں کے جرائم بند کرنا ہے۔
