لاہور میں تحریک انصاف کا پنڈال سج گیا ہے اور جلسہ دیئے گئے وقت کے بجائے ڈیڑھ گھنٹہ تاخیر سے شروع ہوچکا ہے، انتظامیہ کی جانب سے پی ٹی آئی کو سہ پہر 3 بجے سے شام 6 بجے تک کا وقت گیا ہے، اس کے باوجود جلسہ گاہ میں رہنماوں اور کارکنوں کی آمد جاری ہے جبکہ کئی رہنماوں نے اپنے خطابات شروع کردیئے ہیں۔پی ٹی آئی آج لاہور کی کاہنہ مویشی منڈی میں سیاسی پاور شو کر رہی ہے۔ پنڈال کے اطراف پولیس کی بھاری نفری تعینات ہے، پولیس نے رنگ روڈ پر بھی خاردار تاریں بچھا رکھی ہیں تاہم رکاوٹوں کے باوجود کارکن جلسہ گاہ پہنچ رہے ہیں۔ادھر انتظامیہ نے اسلام آباد لاہور موٹروے مکمل طور پر بند کردی جس کے بعد خیبرپختونخوا سے آنے والے قافلوں کیلئے لاہور کے راستے بند ہوگئے ہیں۔ وزیراعلیٰ خیبرپختونخوا علی امین گنڈا پور کارکنوں کی بڑی تعداد کے ہمراہ لاہور پہنچ رہے ہیں اور ان کے ہمراہ رکاوٹیں ہٹانے کے لئے کرین بھی ہے۔انتظامیہ کے مطابق کنٹینر کو پیچھے نکال کر دوبارہ جلسہ گاہ لانے کے لئے کام تیزی سے جاری ہے۔ پی ٹی آئی کے جلسہ گاہ کے پیچھے گندے پانی کا جوہڑ ہے جس کے باعث سٹیج کے لئے کنٹینر جلسہ گاہ کے اندر پہنچانے میں مشکلات کا سامنا کرنا پڑا۔واضح رہے کہ گزشتہ روز سے ہی جلسے سے قبل مفرور کارکنان کی گرفتاری کے فیصلے پر عمل درآمد شروع ہو گیا ہے اور پولیس نے متعدد کارکنان کو گرفتار کیا ہے جبکہ کاہنہ جلسہ گاہ کو جانے والے راستوں کو کنٹینرز لگا کر بند کردیا گیا ہے۔ جس سے شہریوں کو آمدورفت میں مشکلات کا سامنا ہیں۔پولیس نے رائیونڈ روڈ پر ایم پی اے تراب راشد سندھو کی گاڑی روکی، جب انہوں نے اپنا اسمبلی رکنیت کا کارڈ دکھایا تو پولیس نے ان سے وہ کارڈ لے لیا۔ ایم پی اے کا رکنیت کارڈ واپس نہ ہونے پر گرما گرم بحث ہوئی، جس کے بعد پولیس نے انہیں جانے کی اجازت دے دی اور گاڑی کاہنہ روانہ ہوگئی۔تراب راشد کا کہنا تھا کہ پولیس مجھے بتائے میرا قصور کیا ہے؟ کارڈ دکھانے کے باوجود مشکل سے جانے دیا گیا ہے۔اسلام آباد لاہور موٹروے مکمل طور پر بند کئے جانے سے لاہورملتان فیصل آباد اورایئر پورٹ جانے والے شہریوں کو مشکلات کا سامنا ہے۔موٹروے ٹول پلازہ پرگاڑیوں کی لمبی قطاریں لگ گئیں۔ کے پی سے آنے والے قافلوں کیلئے لاہور کے راستے بند ہوگئے ہیں۔نیشنل ہائی وے این 5 پل جوڑیاں پر قانون نافذ کرنے والے ادارے اور پولیس کی نفری پہنچ گئی۔ لاہور جانے والی تمام چھوٹی بڑی گاڑیوں کو روک کرچیک کیا جانے لگا۔پی ٹی آئی کا کارکنوں کولاہور جانے سے روکنے کے لئے پولیس کی جانب سے پل جوڑیاں پرناکہ لگایا گیا۔ہری پور میں قائد حزب اختلاف عمرایوب خان کی قیادت میں سینکڑوں کارکنوں پر مشتمل قافلہ لاہور جلسے کیلئے روانہ ہوگیا۔عمر ایوب خان سمیت صوبائی وزیر بلدیات ارشد ایوب خان سابق صوبائی وزیر یوسف ایوب خان اور ایم پی اے اکبر ایوب خان بھی شامل ہیں۔کارکنان کی جانب سے بانی پی ٹی آئی کو رہا کرو قیدی نمبر804 کو رہا کرو کے نعرے لگائے جارہے ہیں۔ پی ٹی آئی کے جلسے کیلئے ہری پور کی تینوں تحصیلوں سے پی ٹی آئی کے سینکڑوں ٹائیگرز گاڑیوں میں روانہ ہوئے۔چیئرمین تحریک انصاف کی قیادت میں پی ٹی آئی کا قافلہ راولپنڈی سے لاہور کیلئے روانہ ہو گیا۔روات سے روانہ ہونے والے قافلے میں عامرمغل اور شعیب شاہین بھی شامل ہیں۔ پی ٹی آئی کے مطابق موٹروے سے راستہ بند ہے، جی ٹی روڈ سے لاہورآئیں گے۔پشاورموٹروے ٹول پلازہ پر پی ٹی آئی کارکنان وزیراعلیٰ خیبرپختونخوا کا انتظارہی کرتے رہ گئے جبکہ علی امین گنڈا پور اپنی گاڑی میں موٹروے ٹول پلازہ سے نکل گئے۔وزیراعلیٰ کے لئے تین خصوصی کنٹینرز تیار کئے گئے ہیں.لاہور جلسے میں شرکت کے لئے خیبرپختونخوا میں تیاریاں مکمل ہوگئی ہیں اور وزیراعلیٰ کے لئے تین خصوصی کنٹینرز تیار کئے گئے ہیں۔ علی امین گنڈا پور قافلے کی قیادت کریں گے جبکہ رکاوٹیں ہٹانے کے لئے بھاری مشینری بھی قافلے کے ہمراہ ہوگی۔خیال رہے کہ لاہور انتظامیہ نے ڈسٹرکٹ انٹیلی جنس کے اہم اجلاس میں پولیس رپورٹ کی روشنی میں پی ٹی آئی کو جلسے کی مشروط اجازتِ دینے کا فیصلہ کیا تھا۔ اسی اجلاس میں جلسے کا مقام تبدیل اور اوقات کار بھی طے کر لئے گئے تھے۔لاہورکی ضلعی انتظامیہ نے43 شرائط و ضوابط کے ساتھ پاکستان تحریک انصاف کو کاہنہ میں پر جلسے کی اجازت دے دی۔ ڈپٹی کمشنر نے جلسے کی اجازت کا نوٹیفکیشن جاری کردیا ہے۔جلسے کے لئے جاری کردہ نوٹی فکیشن کے مطابق لاہور جلسے کا وقت 3 بجے سے 6 بجے تک ہو گا جبکہ ضلعی انتظامیہ کی جناب سے جاری کردہ شرائط و ضوابط میں کہا گیا تھا کہ وزیراعلیٰ خیبر پختونخوا 8 ستمبرکو اسلام آباد میں کی گئی تقریر پر معافی مانگنی ہوگی۔
