صدر ولادیمیر پوتن برکس سربراہی اجلاس میں شرکت کے لیے بھارت پہنچے ہیں، ہفتے کا دن بنیادی طور پر برکس کے ایجنڈے کے لیے مخصوص ہے، جبکہ کثیرالجہتی سرگرمیوں کے مکمل پروگرام کا آغاز برکس بزنس فورم کے مکمل اجلاس میں روسی صدر کی شرکت کے بعد ہوگا۔برکس ممالک کے رہنما بند کمرہ اجلاس میں ملاقات کریں گے، جس میں صرف تنظیم کے وہ رکن ممالک شریک ہوں گے جن کی نمائندگی اعلیٰ ترین سطح پر کی جا رہی ہے۔روسی صدر کے معاون یوری اوشاکوف نے اس سے قبل بتایا تھا کہ اجلاس میں عالمی اور علاقائی مسائل، عالمی نظام حکمرانی میں اصلاحات اور کثیرالجہتی تعاون کو مضبوط بنانے پر خصوصی توجہ دی جائے گی۔یوری اوشاکوف کے مطابق اجلاس کے دوران برکس کی 20 سالہ سرگرمیوں کے نتائج کا جائزہ لینے کے ساتھ تنظیم کے دائرہ کار میں مستقبل کے تعاون کے امکانات پر بھی غور کیا جائے گا۔برکس سربراہی اجلاس کے اختتام پر مشترکہ اعلامیہ منظور کیے جانے کا امکان ہے، تاہم اعلامیے کی منظوری اجلاس کے لیے لازمی شرط نہیں ہے۔تمام برکس رکن ممالک کے مشترکہ مؤقف کی عکاسی کرنے والی دستاویز پر کام جاری ہے۔ مجوزہ دستاویز میں سلامتی، معیشت اور ثقافت سے متعلق امور کو بنیادی اہمیت دی جا رہی ہے۔برکس سربراہی اجلاس کے نتائج کی علامتی عکاسی کے لیے نئی دہلی میں برگد کا درخت لگانے کی تقریب بھی متوقع ہے۔ مضبوط اور پائیدار برگد کا درخت برکس ممالک کے درمیان باہمی روابط اور اتحاد کے اصولوں کی نمائندگی کرے گا۔سربراہی اجلاس میں شریک تمام رہنما شجرکاری کی تقریب میں حصہ لیں گے، رسمی بیلچوں سے بھارتی سرزمین میں برگد کا درخت لگانے کے بعد برکس رہنما تنظیم کے قیام کی 20 ویں سالگرہ کے موقع پر منعقد ہونے والی خصوصی نمائش کا دورہ کریں گے۔نمائش میں برکس کی گزشتہ دو دہائیوں کے دوران حاصل ہونے والی عملی کامیابیوں کو پیش کیا جائے گا، رہنما انوویٹو انڈیا نمائش بھی دیکھیں گے، جس میں میزبان ملک بھارت مستقبل کے بارے میں اپنا وژن پیش کرے گا برکس سربراہی اجلاس کی سرگرمیاں شام کو بھارتی وزیراعظم نریندر مودی کی جانب سے دیے جانے والے سرکاری استقبالیے کے ساتھ اختتام پذیر ہوں گی۔سرکاری استقبالیہ نئی دہلی کے بھارت منڈپم انٹرنیشنل کنونشن سینٹر میں منعقد ہوگا، شرکا برکس ممالک کے درمیان قائم ہونے والے دوستی، باہمی تعاون اور ایک دوسرے کی حمایت کے تعلقات کا خیرمقدم کریں گے۔برکس اجلاس کی مصروف سرگرمیوں کے باوجود صدر ولادیمیر پوتن متعدد دوطرفہ ملاقاتیں بھی کریں گے، روسی صدر جمعے کو پانچ علیحدہ ملاقاتوں سے شروع ہونے والے مذاکرات کا سلسلہ آج بھی جاری رکھیں گے۔صدر ولادیمیر پوتن ہفتے کو ایتھوپیا کے وزیراعظم ابی احمد علی اور ابوظہبی کے ولی عہد شیخ خالد بن محمد بن زاید آل نہیان سے ملاقات کریں گے۔روسی صدارتی ترجمان دیمتری پیسکوف کے مطابق برکس سربراہی اجلاس کے موقع پر صدر ولادیمیر پوتن کی مختلف رہنماؤں کے ساتھ مختصر اور غیر رسمی ملاقاتیں بھی ہوسکتی ہیں۔دیمتری پیسکوف نے کہا کہ اجلاس کے ہال میں آمد و رفت کے دوران بھی رہنماؤں کے درمیان مختصر تبادلہ خیال اور غیر رسمی رابطوں کا امکان موجود ہے۔
