بھارتی ریاست سکم میں مسلسل بارشوں کے باعث برفانی جھیل پھٹ گئی، یخ بختہ سیلابی ریلا رہائشی علاقے میں داخل ہوکر 120 سےزائد افراد کو بہا لے گیا۔بھارتی میڈیا کے مطابق سکم کے علاقے موگوتھانگ میں اونچائی پر بنی برفانی جھیل مسلسل بارشوں کے باعث پھٹ گئی اور تیز رفتار سیلابی ریلے نے اپنے راستے میں آنے والی ہر شے کو تہس نہس کرکے رکھ دیا۔ سیلابی ریلا ایک فوجی کیمپ میں بھی داخل ہوگیا تھا اور 22 اہلکاروں کو بہا لے گیا جب کہ فوجی تنصیبات کو بھی کافی نقصان پہنچا۔ سیلاب سے مجموعی طور پر ریاست سکم کے 4 اضلاع متاثر ہوئے۔ سیلابی ریلے میں بہہ جانے والے 120 افراد میں سے 14 کی لاشیں برآمد ہوئی ہیں، دیگر افراد کی تلاش کے لیے سرچ آپریشن جاری ہے تاہم موسم کی خرابی کے باعث آپریشن میں شدید مشکلات کا سامنا ہے، متاثرہ علاقوں میں 14 پل تباہ ہوگئے اور کئی علاقوں کا رابطہ منقطع ہوگیا جس کے باعث امدادی کاموں میں دشواری کا سامنا ہے۔ تاخیر سے امدادی اہلکار اور سامان پہنچے سے ہلاکتوں میں اضافے کا خدشہ ہے۔
