اسرائیلی فوج کی غزہ کے ہسپتال پر بمباری کے باعث 500 سے زائد فلسطینی شہید اور سینکڑوں زخمی ہو گئے ہیں۔غیر ملکی میڈیا کے مطابق اسرائیلی فضائی حملے میں غزہ شہر کے الاحلی ہسپتال کو نشانہ بنایا گیا جہاں 10 روز سے جاری اسرائیلی بمباری میں زخمی ہونے والے شہریوں کو مسلسل طبی امداد کیلئے لایا جارہا تھا۔غزہ کی وزارت صحت کا کہنا ہے کہ ہسپتال پر ہونے والے حملے میں کم از کم 500 افراد شہید ہوئے ہیں۔ اسرائیلی افواج نے اقوام متحدہ کے زیر انتظام سکول میں موجود پناہ گزینوں کو بھی نشانہ بنایا۔فلسطینی صدر محمود عباس نے غزہ کے الاحلی ہسپتال پر فضائی حملے کے بعد 3روزہ سوگ کا اعلان کیا ہے۔ غزہ میں حماس حکومت کے میڈیا آفس نے ہسپتال پر حملے کو جنگی جرم قرار دیا ہے۔روس اور متحدہ عرب امارات نے غزہ میں ہسپتال پر اسرائیلی میزائل حملے کے بعد 18 اکتوبر کو صبح 10 بجے اقوام متحدہ کی سلامتی کونسل کے ہنگامی اجلاس بلانے کی درخواست کردی ہے۔
