نگران وزیرخارجہ جلیل عباس جیلانی کا کہنا ہے کہ طاقت کا اندھا دھند استعمال انسانیت کے خلاف ہے۔نگران وزیر خارجہ جلیل عباس جیلانی نے جدہ میں منعقدہ اسلامی تعاون تنظیم کی ایگزیکٹو کمیٹی کے اختتامی وزارتی اجلاس میں شرکت کی ، یہ اجلاس پاکستان اور سعودی عرب نے مشترکہ طور پر بلایا تھا ،اجلاس میں غزہ کے بحران اور وہاں محصور شہریوں کی انسانی صورتحال پر تبادلہ خیال کیا گیا ۔نگران وزیرخارجہ جلیل عباس جیلانی کا اپنے بیان میں کہنا ہےکہ اجلاس میں غزہ پر اسرائیلی جارحیت اور غیر انسانی ناکہ بندی کی شدید مذمت کی گئی،اسرائیلی بمباری کے نتیجے میں ہلاکتیں، تباہی اور معصوم فلسطینی بے گھر ہو رہے ہیں،گزشتہ روز غزہ کے ایک ہسپتال پر اسرائیلی حملے میں بے گناہ شہریوں کے قتل عام قابل مذمت ہے،اسرائیلی قابض افواج بین الاقوامی انسانی اور انسانی حقوق کے قانون کی صریحاًخلاف ورزی کر رہی ہیں،طاقت کا اندھا دھند اور غیر متناسب استعمال جنگی جرائم اور انسانیت کے خلاف جرائم کے مترادف ہے،عالمی برادری سے مطالبہ کیا کہ وہ اسرائیل کو اس کے جرائم کا جوابدہ ٹھہرائے۔
