سائفر کیس میں جیل ٹرائل کرنے کیخلاف چیئرمین پی ٹی آئی کی درخواست نمٹانے کا فیصلہ جاری کر دیا گیا،اسلام آباد ہائیکورٹ کے چیف جسٹس عامر فاروق نے تحریری فیصلہ جاری کیا۔نجی ٹی وی چینل کے مطابق حکمنامے میں کہا گیا ہے کہ 27جون 2023کو اے ٹی سی کو آفیشل سیکرٹ ایکٹ کے تحت ٹرائل کی ذمہ داری سونپی گئی،سیکشن 13کے تحت مجسٹریٹ یا اس سے بہتر درجے کی عدالت کو ذمہ داری سونپی جا سکتی ہے،ڈسٹرکٹ اینڈ سیشنز جج کو بھی مقدمات کے ٹرائل کی ذمہ داری سونپی جا سکتی ہے،اے ٹی سی کو آفیشل سیکرٹ ایکٹ خصوصی عدالت کی ذمہ داریاں سونپنا سیکشن 13کے منافی نہیں۔حکمنامے میں مزید کہا گیاہے کہ چیئرمین پی ٹی آئی کے جیل ٹرائل کی وجوہات حقیقی نوعیت کی ہیں،چیئرمین پی ٹی آئی کا جیل ٹرائل کرنے کا فیصلہ بظاہر بدنیتی پر مبنی نہیں،جیل ٹرائل کیخلاف درخواست میرٹ نہ ہونے کی بنیاد پر نمٹائی جاتی ہے،تحفظات ہونے پر جیل ٹرائل کیخلاف ٹرائل کورٹ سے رجوع کیا جا سکتا ہے۔
