معروف عرب اسرائیلی اداکارہ کو اپنے سوشل میڈیا اکاؤنٹ سے ’دہشت گردی پر اکسانے‘ کی پوسٹ لگانے سمیت وزارت انصاف کی جانب سے دیگر الزامات کا سامنا کرنا پڑا ہے۔غیر ملکی خبرایجنسی کے مطابق اداکارہ میسا عبدالہادی نے اپنی پوسٹ میں اسرائیل پر حماس کے سات اکتوبر کے حملے کی حمایت کا اظہار کیا تھا۔متعدد فلموں، ڈراموں اور ٹی وی سیریز میں اداکاری کرنے والی 37 سالہ میسا عبدالہادی کو رواں ماہ کے آغاز میں غزہ میں عسکریت پسند گروپ کی جانب سے اغوا کی جانے والی اسرائیلی ضعیف خاتون کی تصویر پوسٹ کرنے کے بعد کچھ دیر کے لیے گرفتار بھی کیا گیا۔شمالی اسرائیل کے شہر الناصرہ میں رہنے والی اداکارہ نے اپنی انسٹاگرام سٹوری میں مسکراتے ہوئے ایموجیز کے ساتھ لکھا تھا کہ یہ خاتون ہمیشہ کے لیے مہم جوئی پر جا رہی ہیں۔
اداکارہ نے ضعیف خاتون کو اغوا کرنے والے شخص کے حوالے سے اپنی سٹوری میں ’ہمارے نوجوان اچھے ہیں‘ کا جملہ بھی لکھا۔اسرائیلی وزارت انصاف کی رپورٹ میں کہا گیا ہے کہ انسٹاگرام پر 27 ہزار فالوورز کے ساتھ اس طرح کی سٹوریز جن میں ایسی کارروائیوں کے لیے ہمدردی، حوصلہ افزائی اور حمایت کا اظہار ہو، حالات میں بگاڑ کا سبب بن سکتی ہیں۔وزارت انصاف نے میسا عبدالہادی پر ’دہشت گرد گروپ کے ساتھ تعلق رکھنے‘ کا الزام بھی لگایا ۔
یادرہے کہ اسرائیلی-عرب باشندے اسرائیل کی آبادی کا تقریباً پانچواں حصہ ہیں۔
