لیجنڈری کامیڈین و اداکار عمر شریف کو اپنے مداحوں سے بچھڑے آج 2 سال بیت گئے۔وہ 19 اپریل 1955ء کو کراچی کے علاقے لیاقت آباد میں پیدا ہوئے، اُنہوں نے اسٹیج ڈراموں سے اپنے کیریئر کا آغاز ’عمر ظریف‘ کے نام سے بطور اسٹیج پرفارمر کیا۔ بعد ازاں اُنہوں نے اپنا نام بدل کر ’عمر شریف‘ رکھ لیا اور پھر اسی نام سے اُنہوں نے دنیا بھر میں اپنی پہچان بنائی۔عمر شریف کے مقبول ترین مزاحیہ ڈراموں میں ’بکرا قسطوں پر‘ اور ’بڈھا گھر پر ہے‘ سرِ فہرست ہیں، ان کی مقبول ترین فلموں میں ’مسٹر 420‘، ’مسٹر چارلی‘، ’خاندان‘ اور ’لاٹ صاحب‘ شامل ہیں۔
لیجنڈری کامیڈین و اداکار کو پاکستان انٹرٹینمنٹ انڈسٹری کے لیے ناقابلِ فراموش خدمات کے لیے کئی اعزازات سے بھی نوازا گیا تھا۔عمر شریف کو 1992ء میں ریلیز ہونے والی فلم ’مسٹر 420‘ کے لیے بہترین اداکاری اور ہدایت کاری پر 2 قومی ایوارڈز دیے گئے، اس کے علاوہ انہیں 10 نگار ایوارڈز بھی دیے گئے۔لیجنڈری کامیڈین و اداکار کو ان کی خدمات کے لیے تمغۂ امتیاز سے بھی نوازا گیا۔
